Krech im Paradekisse

Mir kenne e Blaad Babier kreche, dann hotts e Krech – ein Eselsohr. Mir kenne Buxe biele, dann honnse Kreche – Bügelfalten. Unn mir kenne e Paradekisse riechd in de Midde mid de Handkant inknigge – e Krech. For ebbes iwwer Krech eraussefinne daff ma nitt unner K gugge, weil do kimmd nix, wo bassd vumm Sinn her. Unner G find ma awwa „grech/gerech“ im Lexer seim middelhochdeitsche Werderbuch. Unn das hott gemäänt, ebbes is „in gutem stande, wohlgeordnet, gerichtet, fertig, bereit, gerade, aufrecht“. Unn jetz es Paradekisse: Do honn ich mich immer gefroot, warums so hääsd, unn homma vorgestellt, wie an besonnere Daach die Vewandschaft durch Haus gefiehrd wor is for alles se begudachde, wie e Parad ääwe. Awwa do honn ich falsch gelää. Frieher die Firsde, wo gemäänt honn, se wäre ebbes besseres unn se härre blo Blud, harre aangefang midde „Paradezimmer“ unn „Paradebetten“, wo nie jemand drin gelää hot, schreiwe die Grimme Brierer in irm Werderbuch. Vunn do muss es komm sinn, unn do honn sichs anner Leit abgeguggd unn nogemach, was de Riehl Willem schunn 1859 „sinkendes Kulturgut“ genennt hott. Jerefalls weil unser Leit kä extra Stuwe harre unn kä extra Bedder, sinn ääwe die Paradekisse iwwerichgeblieb for nosemache. Kisse mimme besonnere Bezuuch, wo daachsiwwer uff de ferdichgemachde Bedder uff die Koppkisse gestellt wor sinn unn e Krech kried honn riechd in de Midd. Hodder noch Paradekisse orre Beziech? Orre veleicht Bilder devunn? Guud uffhiewe, vesproch?