Los

Mit Los mäne ma e Lottolos orre ebbes wie Schicksal. Lose hotts awwa aach gebb beim Backe, wos um die Reih gang is, wer wann backe dud im Backes. Es erste Los hott nimmand gewollt wäem Aanheize, unns letzte aach nitt, weil do die Hitz schunn wenicher war. Lose konnde awwa aach Sticker Wald sinn, wo de Ferschder abgedält hott fors Hulzmache. Es Wort Los hängt sesamme mit „(los-)lösen“ unn dämno ausem Drumerum „herauslösen“ (die Hollänner saan heit noch zu me Grenzwääch Losweg). Deswäe hotts Wort Los aach e Roll gespielt beim Gemarkungsumgang, weil do die aje Gemarkung praktisch wie aus der vunn de Noberschaft enausgelost aangesiehn wor is. Oft sinn Buwe mitgenomm wor, wo an jerem Grenzstän äner gebatscht kriet honn, for sich däne besser se merke, wenns emo Jander genn sollt mit de Noberschaft wäe de Grenz. Unn am Schluss vunn däm Umgang hotts dann Losweck gebb, vor die Alde e klä Fest, vor die gebatschte Buwe veleicht e kläner Trost.